2020-04-29 (星期三)

【卡加利體壇】新冰球場嘅啟示

一九二八九呢組五位數字，代表位於卡加利馬鞍體育館 (Scotiabank Saddledome) 嘅容量，亦係卡加利唯一合乎職業冰球配套標準嘅球場。馬鞍體育館響一九八三年開幕，曾經舉辦八八年冬季奧運、大型音樂會、職業冰上曲棍球賽事及世界級會議等等，享負盛名。不過，隨著底特律 Joe Louis Arena 停用後，馬鞍體育館亦成為現役全北美歷史最悠久嘅全職冰球場 (你可以話係最舊嘅冰球場館*)。如果你有去過馬鞍體育館，你就見微知著，知道場館已經追唔上現代多用途設施嘅質素！

*新冠病毒疫情對新冰球場嘅準備工作沒有太大影響，二零二零年四月份嘅消息指採購工作仍然運作，估計場館響二零二四年如期開幕。

興建新冰球場呢個題目，已經響卡城各界討論、辯論、爭拗同洽商咗超過十年，結果終於響二零一九年七月三十號獲得市議會 (City of Calgary Council Chambers) 投票通過，將會耗資五億五千萬興建。當日，市議會以十一比四票數通過計劃，協議確定市政府及卡加利體育及娛樂公司 (Calgary Sports & Entertainment Corporation – CSEC) 各出二億七千五百萬，興建「活動場所中心」(Event Centre)，當中包括可以容納一萬九千人的冰球場世界級設施，亦合乎奧運標準。

若果響冰球場上出現呢個比數，就叫「狂數」，響市議會，就叫「大比數通過」，算係一面倒。

A Calgary Hitmen game draws another 10,000 to the Saddledome. Photo: Brian Wong Calgary

通過計劃之前，樽頸位係財政融資安排以及將來分賬問題，有反對市民覺得，點解政府要用公帑「貼錢」俾卡加利體育及娛樂公司。論述亦與當初卡加利嘗試申辦二零二六冬季奧運會以至二零一七市政選舉嘅思維所綑綁，令陰謀論叢生。市長南施與已故卡加利體育及娛樂公司主席 Ken King 多次隔空「開火」，令計畫停滯不前。最後，政府用新面孔議員 Jeff Davison 協助斡旋工作，最終以市政府投資未來，推動刺激經濟嘅論述，說服市議會。

其實，要將民俗情感、自豪感、歸屬感去量化、科學化、理性化，的確困難，而且審死官。近年，卡加利旅遊發展部 (Tourism Calgary) 便加入咗活動 (Event) 成為刺激經濟指標，政府如何利用體壇盛事去推動旅遊、飲食及創造就業機會。當然，有趣嘅係，興建「活動場所中心」論述轉咗用活化舊區刺激經濟及城市未來發展，就立竿見影成為有利可圖嘅計劃，成件事就唔同晒。

Sports & Culture is a major pillar to promote Calgary. Photo: Tourism Calgary

新論述強調，「活動場所中心」(Event Centre) 將會成為卡城未來幾十年發展嘅基石之一，繼續 Put Calgary on the Map。呢種有雞先定有蛋先嘅情況，仲要配合有冒險家精神先可以行前一步，世界體壇比比皆是，有成功，有失敗。例如響英格蘭，一個英超冠軍，令李斯特城揚名世界；響 NBA，一位 Kawhi Leonard，將二十五年籃球響多倫多及加拿大發展，一日千里。又例如，一個又一個想用奧運或世界盃刺激經濟嘅主辦國，多數損手爛腳收場。

火焰隊十五年一潤嘅高潮 (一九八九年史丹利盃冠軍 / 二零零四年史丹利盃打入決賽 / 二零一九年以常規賽西岸冠軍躋身季後賽)，都可以為市民凝聚歡騰，為班主凝聚財富，為城市凝聚名氣，亦令球隊成為卡城市民以及商界不可取代嘅成員。若果單單從創造就業，支持飲食旅遊角度思想，火焰隊係一隻金蛋，同時能夠將卡加利形象推廣至世界。

A lot more Americans learnt about where Calgary was the very first time in 2004 because of the Flames. Photo by Dave Buston / Getty Images

五億五千萬，興建呢個多用途場地，火焰隊決意未來三十五年繼續紮根本土，牛仔節公園及東村地區取得突破性發展骨牌效應，輕鐵綠線準時配合，世界級演唱會重臨，呢個決定，響經濟不景時期創造無限生機。

或者冰球場落成之後，市民仍會追問它對城市發展嘅影響力，但現階段咁睇，呢個係政府有勇有謀有「吉士」嘅市政發展旗艦。

樂觀地拭目以待！

*現役最舊 NHL 冰球場館：紐約麥迪遜廣場 (1968 – New York Madison Square Garden 但已翻新所以不算)，及加州安納海姆本田體育館 (1993 – Anaheim Honda Centre)

轉載自: Feversports Canada